·
陸小姐係裝修公司負責人，朋友介紹咗個業主做全屋裝修連訂做傢俬，個業主自稱專業人士，裝修單位地段亦估計佢屬於中產
個業主持住自己係朋友介紹，喺簽完合約之後，拒絕按裝修公司付款程序，要求裝修公司逐Part做完，要業主現場驗收咗先俾錢，例如做完幅牆，平整度有3-4mm誤差，業主就會發火，然後用要改嘢加嘢嘅借口，要求師傅拆咗佢重做，直至做到尊貴嘅業主滿意為止先可以做下一Part
因為個業主咁玩法會大大拖遲工程進度，所以陸小姐有明確告訴佢，佢需要支付因為清拆重做、工程改動、師傅工數增加而產生嘅後加費用，出咗份新嘅Quotation，業主WhatsApp回覆OK
當工程進度到95%，傢俬已開料只係未送到，個業主突然間叫陸小姐停止工程，然後話裝修公司冇跟佢要求施工，同埋延遲完工產生租酒店費用，陸小姐當然拎新嘅Quotation同佢對質，而呢位業主話對新嘅Quotation毫不知情，仲Block咗陸小姐電話
陸小姐陸續收到律師信，要求陸小姐嘅員工立即離開佢單位，及支付「工程爛尾賠償」+「傢俬貨款」+「酒店租金」，亦有詳細列明細項，共100萬，陸小姐緊係企硬，但電話聯絡唔到佢，去佢樓下就有保安截停，有師傅嘅搵食工具仲喺上面
之後陸小姐收到法庭信，呢位業主正式向裝修公司申索以上唔合理嘅費用，陸小姐諗緊點應對嘅時候，佢下面個判頭原來幫襯過我哋，介紹咗我哋俾佢腦細
我哋團隊經過深入調查之後，搵到呢位業主多個痛點，利用呢一啲痛點同佢談判：庭外和解 + 支付裝修尾數
我哋團隊各方面施壓下，呢位業主依然只願意俾80萬尾數，而陸小姐堅持收齊100萬，最後喺我哋陪同下，陸小姐同業主對咗幾次數，最後企硬收齊全部尾數，陸小姐亦唔需要燒錢請律師