·
揀租客：7大方法踢走租霸疑犯
業主最大惡夢就係遇上租客欠租，本來一心打算收租供按揭，點知收唔到租，仲要搞大一盤先收得返層樓，有啲租霸仲會特登整花間屋。即讀盤點選擇租客7大秘技，踢走租霸疑犯。
- 要求工作同收入證明：講嘢斯文、外表企理唔代表靠得住，最實際嘅方法就係要求租客出示工作同收入證明，睇吓佢哋嘅經濟能力夠唔夠。地產代理通常會幫業主做呢個步驟。
- 睇吓過去交租紀錄：除咗工作證明之外，你都可以要求租客提供過去交租紀錄，例如租單，睇吓佢哋之前係咪有準時交租。
- 留意有限公司：如果租客係用有限公司名義簽約，就要特別小心。公司清盤之後，業主只可以喺公司資產入面索償，而唔可以追討股東嘅個人財產。
- 測試吓佢哋嘅為人：透過閒聊了解租客之前住邊度、點解搬走、做咩工作、平時鍾意做咩等等，可以幫你判斷吓佢哋係咪靠得住，同埋之前係咪曾經同業主鬧過不和。
- 未簽正式租約就唔好交匙：簽咗正式租約打咗釐印之後，先正式建立業主租客關係。租客簽咗臨時租約之後，可能會用各種藉口推搪，所以，喺簽正式租約之前，唔好輕易交出門匙。
- 參考租霸黑名單：Facebook 有流傳一份「租霸黑名單」可以做參考，不過唔可以盡信，應該嘗試核實吓啲資訊。
- 信貸報告：有啲業主會要求租客提供信貸報告(TU)，睇吓佢哋嘅信用狀況。但係呢樣嘢涉及租客嘅個人私隱，唔係慣常做法。
收樓程序：5大步驟處理欠租問題
遇上租戶拖欠租金，業主可以搵執達吏幫忙收樓。業主需要採取法律行動，再由法庭頒布收樓令。
- 入稟追討欠租：租客拖租超過 15 日，業主可以去小額錢債審裁處或法院入稟追討欠租。記得要確認租約已經打咗釐印，同埋已經向差餉物業估價署交咗《新租出或重訂協議通知書》（CR109）。
- 提交收樓同追租申請：如果係向土地審裁處申請收樓，你需要填寫《申請通知書》（表格 22）及《致實際管有或居住者通知書》，先可以申請執行令狀。另外需要提交身份證、租約正副本、租單存根等等文件。
- 向租戶發出通知書：提交申請通知書後7日內，要向租戶送一份副本，同埋將《致實際管有或居住者通知書》副本連續3日貼喺欠租單位門口（俗稱門口紙）。通知書入面會寫明通融期，即係租客喺指定期限內還清租金，業主就唔會收回單位。 貼咗3 日都未交租，業主須喺3日內向審裁處提交《送達確認書》（表格30）。租戶可於7日內作出答辯。
- 申請收樓令：如果租戶冇提出反對，業主可以申請審裁處批出判決書，之後再向審裁處申請發出收樓令狀。
- 上門收樓：申請收樓令之後，執達吏會喺1至2星期內上門通知租戶搬走。如果租戶7日之後都仲未搬走，執達吏就會發出《最後遷出通知》。正式收樓嗰日，執達吏會同業主一齊上門，如果租戶唔肯開門，隨行嘅開鎖佬會協助破門。如果租客反抗，執達吏會代為報警。
搵收數公司？
Debt Hunter 成立於2009年，為中小企提供合法收數服務，追收團隊超過20人，絕無外判人員，已協助超過10,000家公司收回欠款，信用資料庫全港最齊，梗幫到你。
Debt Hunter 將通過不成功不收費、先調查後調解嘅模式，為傳統收數行業帶來新嘅變革，不斷為客戶創造價值，引領行業發展。