你有冇試過想搵收數公司幫手，但收數公司問咗兩句就話唔接？今日我哋就嚟講解啲收數公司通常唔會接嘅個案，俾你一個全面嘅了解，免得你浪費時間同精神。
收數公司嘅作用
收數公司係專門幫債主追討欠款嘅公司，但佢哋都有自己嘅標準同限制。唔係所有個案都值得佢哋去跟進，因為有啲個案根本冇可能追得返錢，甚至喺法律上、道德上有問題。
如果你想用收數公司幫手追數，你需要知道邊啲情況會被拒絕，咁樣你先可以預先準備好相關文件、證據，或者考慮其他方案。
一、【三無債仔】｜完全缺失任何聯絡方法
如果你冇欠債人公司名、地址，連電話都停咗，淨係得佢張相，同埋知佢叫「金毛強」，收數公司根本無從入手。試想像一下，你連一個聯絡方式都冇，收數公司又點可以追數呢？搵人都要有足夠線索啦，呢個情況根本就係大海撈針，幾乎係冇可能成功。如果你想請收數公司幫手，請確保你有至少一個有效嘅聯絡方式。
3大聯絡方式：公司 / 個人全名 ＋ 電話 + 地址
二、【搭搏頭】｜只有口頭承諾
欠債人只係口頭上講過要俾錢，但冇任何文件證明？收數公司會問你：「你有冇任何書面證據？」因為實際上，口頭承諾唔夠力度。試想像你同朋友約好一件事，但只係口頭上講過，幾年後你朋友話唔記得，你又點證明呢？任何金錢交易都要有書面證據，發票、合約、借據都係必需品。
三、【屎忽數】｜對方本身就追緊你數
如果對方一早就追緊你數 （戶主追討裝修爛尾損失），仲要上埋法庭告你，你知道冇勝算，所以就唔出庭，轉而搵收數公司幫手「解決爭議」 （裝修公司追討戶主工程尾數），通常收數公司會拒絕。因為呢類情況多數你係想借收數公司過橋，收數公司未必拆穿你，但一定做足盡職調查。
四、【投資數】｜有投資成份嘅個案
如果你投資咗某個項目，話有保證派息，但最後派唔到息，想追數，收數公司會判定你呢個唔係壞賬，而係投資決定。投資本來就涉及風險，收數公司係幫人追數，而唔係解決你投資失利嘅損失。
五、【情債】｜親人或伴侶間嘅欠債
債主同欠債人係親人或者曾經係夫婦 / 情侶，收數公司通常會避開呢類個案。因為呢種情況涉及私人感情，收數公司唔會想介入。想像你同你前度爭執，仲要請收數公司去追數，情況會唔會變得更加複雜？
六、【陳年舊數】｜超過4年嘅個客
債主突然拎出超過10年前嘅舊數，因為自己最近冇錢先追，欠債人公司早幾年前已經執笠，收數公司通常唔會接呢類個案。根據《時效條例》，違反一般商業合約債務追討期為6年，但收數公司多數只會接4年內嘅個案。
七、【慣犯】｜爭成條街都未驚過
如果欠債人爭落10幾條街數，收數公司會擔心欠債人嘅財務狀況，有啲根本一睇就知冇可能會找數。你可以查詢咗先，但如果收數公司話唔做，你要有放棄嘅打算。
債務飽和定律：債務總額 > 可執行資產價值300% → 回收可能性趨近於0
避開爛數3個要點
- 文件要齊：蓋章報價單 / 簽收送貨單 / 書面付款協議
- 追數要快：逾期7日即出reminder / 30日未找立即搵收數公司
- 搵專業人士把關：大額交易前搵 Debt Hunter 做公司背景調查
搵食艱難，係，係艱難，但接得你case就要對得住專業。記住，預防爛數比追數更重要，你今日嘅一張PO，可能就係聽日嘅救命符！
搵收數公司？
Debt Hunter 自2009年起為中小企提供合法收數服務，追收團隊超過20人，絕無外判人員，已協助超過10,000家公司收回欠款，信用資料庫全港最齊，梗幫到你。
Debt Hunter 將通過不成功不收費、先調查後調解嘅模式，為傳統收數行業帶來新嘅變革，不斷為客戶創造價值，引領行業發展。